Hallo, en welkom by my nuusbrief.

In die vorige nuusbrief het ek jou vertel waaroor Blinde Kol gaan. Nadat die jong man sy pad by die die dameskoshuis ingeskiet het, kordoneer die polisie die gebou af en maak kontak. Maar hy weier om met hulle te praat: “Ek wil nie met jou praat nie, ek wil met Karla praat.”

“Ek wil nie hê jy moet nog iemand doodmaak nie, nie een van die meisies nie en ook nie jouself nie.”

AO Karla Blanckenberg weet nie hoekom die jong man met haar wil praat nie; sy herken hom nie. Maar iewers in die verlede moet daar ’n konneksie wees. Terwyl sy die oorfone op haar kop skuif, weet sy sy moet versigtig wees: Die liggame by die ingang bewys dat hy kan—en sal—doodmaak.

Blanckenberg het voorheen in Losprys verskyn. Daardie saak het sy tol op haar geëis en heelwat lesers het oor die jare gevra wat verder met haar gebeur het. Sy was intussen in ’n kortverhaal (“Man op ’n brug”) in Skimme en Spoorsoekers, maar in Blinde Kol vind ons regtig uit wat deesdae in haar lewe aangaan.

“Probleem is ons het niks wat hy wil hê nie. Hy het die girls by hom. Hy kan hulle skiet net wanneer hy wil.”

AO Jock Ruhling is die sekondêre onderhandelaar wat saam met Blanckenberg in die NOC—die Negotiation Operational Centre—sit terwyl sy met die jong man praat. Hy help met strategieë en ondersteuning, en skakel met die res van die onderhandelingspan.

In die volgende nuusbrief vertel ek jou ’n bietjie meer oor nog ’n karakter se terugkeer: AO Colin Menck van Donker Spoor, Skuldig en die novelle “Koue Bloed” in Skimme en Spoorsoekers.

Dankie dat jy gelees het.

m.s.

Hallo, en welkom by my nuusbrief.

Daar is iets op pad …

Dis wat die jong man sê nadat hy sy pad by ’n dameskoshuis ingeskiet het. Minstens twee meisies lê dood voor die ingang. Niemand weet hoeveel daar nog aan die binnekant is nie. Maar die polisie weet hy het gyselaars geneem.

Hoekom het hy juis vir AO Karla Blanckenberg (Losprys) gevra? Nie sy of die ander lede van haar gyselaaronderhandelingspan herken hom nie.

Intussen arriveer AO Colin Menck (Donker Spoor, Skuldig) ook op die toneel. Met ’n dogter wat self ’n student is, voel die situasie heeltemal te persoonlik.

Terwyl Blanckenberg die jong man se binnewêreld probeer ontsluit, grawe Menck in sy verlede om uit te vind wat hom tot hierdie punt gedryf het. Maar hoe meer hulle leer, hoe meer onvoorspelbaar raak die situasie, en hoe groter die lewensgevaar vir almal betrokke.

Blinde Kol kom in September.

In die volgende nuusbrief vertel ek jou ’n bietjie meer oor die terugkeer van AO Karla Blanckenberg. Sy het ’n vlugtige verskyning in “Man op ’n brug” in my kortverhaalbundel Skimme en Spoorsoekers gemaak, maar ons het haar laas regtig in Losprys gesien.

Dankie dat jy gelees het.

m.s.

’n Man staan op ’n brug, reg om te spring. ’n Geheimsinnige vrou verskyn snags langs die Knysna-meer. Twee tieners volg ’n vreemde lig en maak ’n donker ontdekking. ’n Stiefpa hou aan terugkom. ’n Boemelaar word wakker in ’n veranderde wêreld. ’n Meisie probeer haarself weer aanmekaar las. ’n Ander een probeer haarself vermom. ’n Derde een worstel met die dood.

21 stories wat oor die afgelope 27 jaar uit Martin Steyn se donker verbeelding gekruip het, insluitend sy eerste gepubliseerde storie en ’n vervolgverhaal met AO Colin Menck (Donker Spoor, Skuldig). Stories wat in bundels en tydskrifte verskyn het, stories wat nog nie voorheen gepubliseer is nie. Stories oor hunkering, trauma en onmoontlike keuses. Stories met donker draaie en wrang kinkels. Stories oor skimme en spoorsoekers.

Waar kom die storie vandaan?

’n Kortverhaalbundel is my oudste skryfdroom, gebore in my hoërskooljare toe ek kortverhale begin skryf het. Stephen King is die rede hoekom ek regtig begin lees het, en die rede hoekom ek begin skryf het, en ek het gereeld na sy bundels soos Skeleton Crew en Nightmares & Dreamscapes gestaar en gedroom oor so ’n boek met my naam voorop.

Deur die jare het my stories nogal deur ’n evolusie gegaan, van gruwel of bonatuurlike elemente tot by die grinterige realisme van my polisierillers. Die laaste en langste storie is as ’n vervolgverhaal vir Vrouekeur geskryf en is soortgelyk aan Donker Spoor en Skuldig, net korter. Dis dan ook AO Colin Menck wat die moord van die jong vrou ondersoek ná sy in ’n plas bloed op haar kombuisvloer gevind is. Haar boyfriend is skoonveld, en met die oordaad steekwonde wat op ’n passiemoord dui, wil Menck en Winters graag met hom praat. Die oordadige steekwonde het my ook uiteindelik die geleentheid gegee om met ’n bloedspatselanalis te gaan praat oor hoe so ’n toneel geprosesseer en geïnterpreteer word.

Wie is die hoofkarakters in Skimme en Spoorsoekers?

“Wat de hel het gisteraand gebeur?”

Karl Ziegler ontdek sy meisie op die kombuisvloer in ’n plas bloed. Al wat hy van die vorige aand onthou, is ’n ry Tequila-glasies, verder niks. En nou lê Marlette dood op hulle vloer en daar is droë bloed onder sy vingernaels. Hy kon dit mos nie gedoen het nie. Kon hy?

“Ek was vir sewe en twintig sekondes dood.”

Simon is saam met sy ouers langs een van die mere in Sedgefield vir die Septembervakansie. Hy wil net alleen wees. Tot Luna langs hom op die pier kom sit. Dis moeilik om vir ’n mooi meisie nee te sê …

“Dié is nie CSI Mitchells Plain nie.”

Sersant Asim Hendricks staan op ’n moordtoneel waar die slagoffer met ’n hamer doodgeslaan is. Sy seuntjie kruip onder die bed weg. Hendricks slaag daarin om die kind met KFC uit te lok en kry vier woorde as beloning: “My daddy is dood.” Daarna sê hy niks. Maar wat kruip in sy kop weg? En weet die moordenaar hy was daar?

Wat sê resensente oor Skimme en Spoorsoekers?

Steyn … daag jou uit met karakters wat jou laat ril én wie jy wil beskerm.

Ilza Roggeband, Die Burger

Dis ’n heerlike leeservaring … Om dit so op een slag te verslind en die skrywer agter die woorde te gewaar is uiters bevredigend.

Deborah Steinmair, LitNet

Dit is skryfkuns op sy beste.

Stefaans Coetzee, Rapport

Kan ek ’n stukkie lees?

Ja! Daar is ’n uittreksel uit “Koue Bloed” op my webwerf.

Ná drie jaar in die Suid-Afrikaanse Polisiediens is konstabel Alex Steytler gewoond aan die roetine van douvoordag opstaan, inry Kaap toe, op ’n trein klim en twaalf ure lank trokke of stasies patrolleer. Die lelike kant van die lewe is waar hy werk, anders as Tasha in die woonstel langsaan wat haar kamera op die mooi fokus.

Maar nou het sy vriend en medebeampte hom by nog iets ingesleep, en hierdie keer is dit nie so eenvoudig soos ’n motorfiets koop nie. Nee, Pyper wil by die Duikeenheid aansluit, want treintrappe, tikkoppe en messtekers bied klaarblyklik nie genoeg opwinding nie. En nou staan Steytler tot by sy naeltjie in ’n rivier vol riool op soek na die slagoffer van ’n boendoehof.

Dis net die begin. Om lede van die Duikeenheid te word, sal hulle behoorlik aan die diep kant ingegooi word. Toe Steytler vroeg in die jaar tussen die stukke van ’n treintrapslagoffer gestaan het, kon hy nie weet dat hy teen die einde sy eie stukke sal moet bymekaar maak, of moontlik dele van homself vir ewig verloor nie.

“Hierdie tou is jou lifeline. Jy los hom nie.” Want in donker water is dit al hoe jy jou pad terug kan vind.

Waar kom die storie vandaan?

Ek het eintlik net met ’n polisieduiker gaan praat vir ’n spesifieke toneel, maar toe vat hy my ná die onderhoud na die stoor toe om hulle bote en toerusting te gaan wys, en van die ander duikers kom sluit by ons aan en begin stories vertel. Oor verstrengel raak in vistoue onder ’n boot, liggame in rioolwater, insidente met haaie, storms op see. Polisieduikers duik nie op mooi plekke nie. Inteendeel. Hulle duik gereeld in donker water, waar daar swak of geen sig is nie, waar hulle hande die soekwerk doen, waar hulle in enigiets kan vasswem, aan enigiets kan vashaak, waar ’n tou na ’n ander duiker op die wal of ’n boot hulle enigste vorm van kommunikasie is wanneer iets verkeerd gaan, in water waarin ’n persoon onlangs dood is. Hulle stories het my só aangegryp dat ek gevoel het ek moet dit vertel.

Wie is die hoofkarakters in Donker Water?

“Water is nie ’n dooie mens se vriend nie.”

Konstabel Alex Steytler het by die polisie aangesluit omdat dit die beste opsie was waaraan hy kon dink. Sy oom is ’n brandweerman, maar om na vlamme toe te hardloop, maak nie vir hom sin nie. Eerder die treine op die Kaapse Vlakte as lid van die Rapid Rail-eenheid patroleer, ten spyte van al die karakters wat dit as ’n jagveld vir prooi sien.

“Ek weet nie hoe jy geleef het voor jy my ontmoet het nie.”

Konstabel Marcel Pyper is ook ’n lid van Rapid Rail. Van nature avontuurlustig, het hy in Steytler ’n meeloper gevind om by sy belangstellings en aktiwiteite in te sleep, alles van motorfietspretritte tot duikkursusse. Maar sy eintlike doelstelling is om by die Duikeenheid aan te sluit. En Steytler moet saamkom.

Wat sê resensente oor Donker Water?

Ek was meegevoer deur die storie van twee vriende, twee verskillende lewensuitkyke en een besluit wat alles vir altyd verander.

Erla Diedericks, LitNet

Wat die roman laat voortstu en onneersitbaar maak, is die dinamika tussen karakters, die manier waarop Steytler mettertyd, in vuil water, op soek na liggame en wapens, homself ontdek.

Deborah Steinmair, Vrye Weekblad

Hierdie roman het my onkant gevang omdat dit geensins ’n geykte resep volg nie.

Francois Bekker, Penguin Post

Kan ek ’n stukkie lees?

Ja! Daar is ’n uittreksel op my webwerf.

“Ek het jou seun. Moenie die polisie bel nie. As julle alles doen wat ek sê, sal ek hom nie seermaak nie. Ek sal weer bel.”

Adjudant Enzo Ariefdien verkies moorde. Dooie slagoffers. Hy wil nie ’n vermiste lewe in sy hande vashou nie, nog minder ’n kind s’n. Maar dis presies wat hy kry en dis boonop ’n ontvoering vir ’n losprys. ’n Hoëprofielsaak met die desperate Amerikaanse ouers aan die een kant en die ambisieuse kaptein Lubambo aan die ander. En almal wil resultate hê.

Intussen trek die onderhandelingspan by die gesin se huis in Llandudno in, adjudant Karla Blanckenberg in die rol van primêre onderhandelaar. Uitgelewer aan die ontvoerders se skedule om kontak te maak—en te verbreek—kan sy net wag en dis dan wanneer die handjie met die rooi gaatjie haar bly teister.

Die ontvoerders het duidelik die gesin se roetine geken. Maar is die gesin van buite dopgehou? Of van binne? En hoekom klink dit asof daar iets meer persoonliks agter die ontvoering skuil?

Waar kom die idee vandaan?

Ek het toevallig ’n afgetrede gyselaaronderhandelaar ontmoet en dit was onweerstaanbaar om nie die geleentheid uit te buit nie. Dis ’n fassinerende proses, onderhandeling met ’n persoon wat iemand gyselaar hou of homself met ’n wapen in ’n gebou toemaak en weier om uit te kom. ’n Misdaad in Kaapstad ’n klompie jare tevore het by my opgekom en die inspirasie gegee vir die gesin wat in Losprys geteiken word. Boonop het ek al voorheen met een van die speurders gepraat wat die saak ondersoek het.

Twee karaktervolle plekke in die Kaap het as agtergrond gedien: Houtbaai en Llandudno, waar die gesin se herehuis is, en Mitchells Plain, waar my nuwe speurder vandaan kom. Ek hou daarvan om na die plekke toe te gaan waar my stories afspeel, nie net omdat dit help om ’n plek te verstaan wanneer jy daar loop en die lug ruik en die geluide hoor nie, maar ook omdat daar gereeld storielyne daaruit spruit (ook vir ander stories, soos ’n paar kortverhale wat later in Skimme en Spoorsoekers verskyn het).

Wie is die hoofkarakters in Losprys?

“Ek wil graag help om die situasie op te los.”

AO Karla Blanckenberg is die primêre onderhandelaar by die Gordon-toneel, die een wat direk met die ontvoerder praat. Maar dat die gyselaar ’n kind is, krap die rowe van ’n onlangse toneel af en sny uiteindelik veel dieper tot in haar eie kinderdae. Boonop kan sy nie soos by die tipiese onderhandelingstoneel kontak maak nie; die ontvoerder besluit wanneer hy wil bel en druk die foon dood wanneer hy nie verder wil praat nie.

“’n Moordspeurder is wat ek nog altyd wou gewees het.”

AO Enzo Ariefdien het as tienerseun ’n fassinasie met moordspeurders ontwikkel toe hy in Mitchells Plain die speurders dopgehou het terwyl hulle die Stasiemoordenaar ondersoek. ’n Seun wat ontvoer is, en dit nog vir ’n losprys, is nie die soort dossier wat hy wil hê nie. Sy kollega, sersant Fikiswa Zaphalala, daarenteen, is heel opgewonde om vir ’n verandering ’n slagoffer te hê wat nog lewe, en steeds kan lewe wanneer die dossier afgehandel word.

Wat sê resensente oor Losprys?

Losprys verteenwoordig ’n nuwe hoogtepunt in die skrywer se oeuvre.

Jonathan Amid, Rapport

Met elke boek groei sy karakters. Volronde, geloofwaardige mense.

Ronel Nel, rooi rose

Hierdie boek byt en hy klou—jy word meegesleur met die spannende jagtog, die ontrafeling tot op die klimaks en ontknoping.

Samantha Buitendach, LitNet

Kan ek ’n stukkie lees?

Ja! Daar is ’n uittreksel uit hoofstuk een op my webwerf.

Vir haar.

En nou word Claire Winters iewers in ’n sel van sement gevange gehou. Eers plaas sy haar hoop op haar speurderbroer. Hy weet wie die man is wat haar ontvoer het. Maar nog ’n lang, donker dag eindig met ’n toebroodjie en ’n glas water en Derek kom nie. Claire besef hierdie keer sal sy haarself moet red. Voordat haar verstand heeltemal in die swart van die kelder oplos.

Die enigste uitweg is deur haar ontvoerder. Want hy het die kelder se sleutel. Maar net toe sy dink sy begin vordering maak, vind Claire uit waarvoor sy regtig aangehou word.

Waar kom die storie vandaan?

’n Ou kragstasie waar treine steenkool afgelaai het. Donker tonnels vol spinnedrade daaronder. ’n Vervalle plaashuis. ’n Verlate steengroef. ’n Eksperiment met vals naels. En nog een met pepersproei (wat ek nie sal aanbeveel nie, al het dit vir ’n baie akkurate beskrywing gesorg). Ek het minder met lede van die polisie gepraat en meer met ontkleedansers. Ja, die navorsing vir Swartval was ’n bietjie anders.

Wie is die hoofkarakters in Swartval?

“Ek gaan nie weer iets opgee oor ’n man nie.”

Claire Winters het haar droom en aardse besittings in haar Taz gepak en van Robertson af Kaap toe gery, en voor haar broer Derek (Skuldig) se deur in Bellville stilgehou. Dit was haar eerste daadwerklike tree om die wêreld te sien, om saam met die pienk dolfyne in die Amasone te swem, om op te klim tot by Machu Picchu. Sy kry werk by Col’Cacchio en begin spaar. ’n Ander kelnerin vertel haar hoeveel geld sy by Teazers gemaak het. Eers dink Claire dis ’n absurde idee, maar toe gaan sy saam met Yolande Teazers toe en praat met die dansers en skielik lyk haar droom baie meer bereikbaar. Sy besluit om die kans te waag en raak stadig gewoond aan hierdie wêreld. Tot iemand begin om swart blomme onder haar ruitveër te los …

“Want ek wil hulle vat en hulle hê en hulle seermaak.”

Eers los die bekruiper een rooi blom onder Claire se ruitveër. Toe ’n dooie een. Toe drie swart blomme. Die sesde keer kom hy met ’n mes …

Wat sê resensente oor Swartval?

Martin Steyn se derde krimi is ongetwyfeld die vreesaanjaendste, spannendste riller uit die korpus van Suid-Afrikaanse misdaadfiksie wat in 2016 uitgereik is.

Jonathan Amid, Rapport

Steyn voer ’n kragtoer uit deur in die prooi se kop te klim.

Ronel Nel, rooi rose

Ek hou nie eens van sielkundige rillers nie, maar ek het dié roman verslind omdat die verhaal met soveel vaart bly voortsnel en omdat die karakters al veelkantiger raak.

Willie Burger, Vrouekeur

Kan ek ’n stukkie lees?

Ja! Daar is ’n uittreksel op my webwerf.

’n Middeljarige tandarts, tereggestel in sy sitkamer. Teen die muur, een woord. In bloed. Adjudant Colin Menck kyk na die “skoon” toneel en is oortuig dis ’n professionele moordenaar se werk.

Wie het hom gehuur? Die hoofverdagte is die slagoffer se vrou, wat net te onemosioneel oor die moord is. Maar wat het hy gedoen om so ’n dood te verdien?

Minder as ’n week later staan Menck weer voor ’n muur met sewe bloederige letters. Hoeveel name is op hierdie moordenaar se lys? Hoeveel mans gaan nog SKULDIG in hulle eie bloed skryf?

Waar kom die storie vandaan?

Skuldig is die gevolg van een van daardie rare oomblikke waar ’n storie net vanself in my kop oopvou (gewoonlik kry ek meer direkte inspirasie uit iets wat oor my pad kom). Ek het hierdie man gesien wat hard asemhaal en iets teen ’n muur skryf—SKULDIG—in sy eie bloed, en toe kniel met ’n pistool wat op sy kop rig.

Die koeëls in die slagoffers se koppe is natuurlik belangrik om die soort vuurwapen te identifiseer, vas te stel of dit uit dieselfde wapen gekom het, en te vergelyk met enige vuurwapens wat in verdagtes se besit gekry word. Dus was ek terug by die forensiese patoloë. Ek het ook kontak met die Suid-Afrikaanse Polisiediens se Ballistiekafdeling gemaak en die voorreg gehad om die Forensiese Wetenskaplaboratorium te besoek. Dit was baie interessant om te sien waar die wapen in water geskiet word sodat ’n koeël met daardie wapen se unieke merke in die Integrated Ballistic Identification System geskandeer kan word vir ontleding.

Wie is die hoofkarakters in Skuldig?

“Die hele ding is net te netjies, te klinies.”

AO Colin Menck bevind homself in ’n nuwe rol, dié van die seniorvennoot, nadat hy jare lank saam met die ouer AO Jan Magson (Donker Spoor) gewerk het. Langs hom sit die veel jonger Derek Winters, ’n aanpassing waarmee hy nog sukkel. Bo hom is die nuwe groepleier, die ambisieuse kaptein Fundile Lubambo, wat ’n baie ander benadering as sy voorganger volg. En voor hom is ’n tweede muur waarop ’n middeljarige man SKULDIG in sy eie bloed geskryf het voordat hy tereggestel is. Wat beteken hy moet vinnig uitvind wat die konneksie tussen hierdie twee slagoffers is as hy nie voor nog ’n muur wil staan nie.

“Dink jy mens word goed gebore? Of moet iemand jou leer?”

AO Derek Winters is van die Robertson-speurtak na die Ernstige Geweldsmisdaadeenheid oorgeplaas. Jonk en nuut, wil hy homself bewys in die spesialiseenheid waar hy so graag wou wees. En nie die verkeerde soort aandag trek nie. Winters is ongetroud en bly saam met sy jonger suster, Claire.

Wat sê resensente oor Skuldig?

Skuldig is die soort boek wat maak dat mens alles opsy skuif om te lees.

Ilse Salzwedel, Maroela Media

Skuldig is met tye ’n genadeloos intense roman wat die leser se morele kompas stuk vir stuk aftakel.

Jonathan Amid, LitNet

Die deernis waarmee Steyn sy karakters uitbeeld en die helder beeld wat hy skep van die omgewing en die misdade verseker dat ek beslis in die toekoms leestyd sal afstaan aan sy speurtogte.

Coenraad Walters, Die Burger

Kan ek ’n stukkie lees?

Ja! Daar is ’n uittreksel uit hoofstuk een op my webwerf.

Hulle kry haar ontbindende liggaam in die veld. ’n Tiener. Sy is verkrag en gemartel. Uiteindelik gehang. Sy is nie die eerste een nie. Ook nie die laaste nie.

Adjudant-offisier Jan Magson moet die reeksmoordenaar vang. Hy moet die meisies se pa’s en ma’s in die oë kyk en hulle vrae beantwoord, maar hy kan nie. Hy kan nie eens sy eie vrae beantwoord nie. Want agter hom lê ook ’n donker spoor wat sy seun van hom vervreem het.

Wat is regtig erger? Om die een te wees wat doodgaan? Of die een wat bly lewe?

Waar kom die storie vandaan?

Reeksmoordenaars fassineer my al vandat ek The Silence of the Lambs gesien het en uitgevind het daar bestaan sulke mense. Ek het oor reeksmoordenaars soos Ted Bundy en Jeffrey Dahmer begin lees. En toe die boeke deur profielsamestellers soos Robert Ressler, John Douglas en Roy Hazelwood van die FBI, en Dr Micki Pistorius van die Suid-Afrikaanse Polisiediens.

Intussen het ek ook by die SAPD gaan aanklop om uit te vind hoe moorddossiere in Suid-Afrika ondersoek word. So het ek by die Ernstige Geweldsmisdaadeenheid in Bishop Lavis uitgekom. Die speurders wat die reeks moorde in Donker Spoor ondersoek, is lede van een van die vier bystandgroepe van EGM.

Dis belangrik om te weet presies wat aan die slagoffers gedoen is omdat dit soveel oor die persoonlikheid van die moordenaar sê, en dus het ek ook met patoloë by die Forensiese Patologiedienste gepraat en selfs ’n outopsie bygewoon.

Wie is die hoofkarakters in Donker Spoor?

“Ek wil nie nog ’n meisie se foto teen die muur vassit nie.”

AO Jan Magson is in die laaste jare van sy polisieloopbaan. Nog in rou ná sy vrou se dood, is ’n reeksmoorddossier die laaste ding waarvoor hy kans sien. Want dit gaan aanhou en aanhou totdat hy die moordenaar vang. As hy hom vang. Boonop is dit duidelik uit die merke en beserings op die tienermeisies se liggame dat hulle ’n paar dae lank aangehou en gemartel word. En met elke nuwe slagoffer word die druk groter: die oppergesag, die media, die ouers …

“Ek mis die negentigs. Mens kon rook in die negentigs.”

AO Colin Menck is Magson se kollega en hulle is al jare lank saam. “M&M”, noem een van sy informante hulle. Met Menck se sin vir humor en Magson se ernstiger benadering, vul hulle mekaar meestal goed aan. Meestal.

Wat sê resensente oor Donker Spoor?

Steyn is in voeling met die genre—hy weet presies hoe om spanning te fabriseer, hoe om sy karakters eg en oortuigend te skets, hoe om die leser enduit te boei met ’n roman wat by tye besonder grieselrig en ontstellend is.

Jonathan Amid, LitNet

Steyn se karakterisering is uitmuntend, en dis veral die hoofkarakter wat baie emosie by die leser ontlok.

Johan Smith, Rapport

Die humor is skerp en is veral te vinde in die dialoog tussen Mags en Menck.

Nadine Hamman, Tydskrif vir Letterkunde

Kan ek ’n stukkie lees?

Ja! Daar is ’n uittreksel uit hoofstuk een op my webwerf.